Jón Ólafur er tilnefndur af SA og tók sæti í stjórn í júní 2020. Hann er formaður stjórnar Samtaka atvinnulífsins auk annarra stjórnar- og ráðgjafarstarfa. Jón starfaði hjá Olís í 27 ár, þar af sem forstjóri í 7 ár.

Jón Ólafur er með B.Sc. í véltæknifræði frá KTH Kaupmannahöfn, MBA með áherslu á fjármál fyrirtækja og MS í stjórnun og stefnumörkun í viðskiptafræði frá Háskóla Íslands og AMP diploma frá IESE í Barcelona.

Stefán er tilnefndur af VR og tók sæti í stjórn í ágúst 2019. Hann hefur starfað sem framkvæmdastjóri VR frá árinu 2013 og verið í endurskoðunarnefnd sjóðsins frá árinu 2014 að frátöldum árunum 2019-2021. Stefán starfaði áður en hann kom til VR sem rekstrarstjóri Háskólans á Bifröst og var áður forstöðumaður fyrirtækjasviðs Sparisjóðs Mýrasýslu.

Stefán er með meistarapróf í lögfræði frá Háskólanum í Reykjavík, BSc í viðskiptalögfræði, BSc í viðskiptafræði, diplóma í rekstrarfræðum, próf í verðbréfamiðlun og sveinspróf í rafvirkjun.

Arnar er tilnefndur af VR og tók sæti í stjórn í mars 2026. Arnar starfar sem viðskiptastjóri erlendra fjárfestinga hjá Íslandsstofu.  Hann hefur starfað lengi við atvinnuþróun hjá aðilum á borð við Aflvaka Reykjavíkur, Útflutningsráð og Fjárfestingastofu.  Arnar hefur einnig starfað sem aðstoðarmaður ráðherra iðnaðar- og nýsköpunar og fjármála- og efnahagsmála auk þess sem hann starfaði sem upplýsingafulltrúi Alþýðusambands Íslands.

Arnar er með MA gráðu í menningarfræði frá Birmingham háskóla í Englandi og BA gráðu í fjölmiðla- og bókmenntafræði frá Háskóla Íslands.

Drífa er tilnefnd af VR og tók sæti í stjórn í mars 2026. Drífa er talskona Stígamóta og hefur gegnt þeirri stöðu frá 2023. Áður var hún forseti ASÍ frá 2018-2022 og starfaði sem framkvæmdastjóri Starfsgreinasambands Íslands í sex ár á undan því.

Drífa er með BS próf í viðskiptafræði frá Háskóla Íslands og meistarapróf í vinnumarkaðsfræðum með áherslu á vinnurétt frá háskólanum í Lundi í Svíþjóð. Þá er hún einnig viðurkenndur bókari. 

Guðmunda er tilnefnd af VR og tók sæti sem aðalmaður í mars 2024. Hún starfar sem  framkvæmdastjóri Íþróttabandalags Akraness og hefur víðtæka reynslu af rekstri í verslun og þjónustu á Íslandi og í Noregi auk þess að starfa við bókhald og innheimtu.

Guðmunda hefur lokið MBA prófi frá Háskóla Íslands. 

Guðrún er tilnefnd af FA og tók sæti sem aðalmaður í stjórn í mars 2022. Hún er framkvæmdastjóri Atlantsolíu og hefur stýrt því fyrirtæki frá 2008. Áður starfaði hún við fjármálastjórn í sama fyrirtæki og hjá heildverslun.

Guðrún hefur setið í stjórn FA síðan 2019 og verið formaður félagsins frá 2021. Hún er menntaður viðskiptafræðingur með cand. oecon frá HÍ auk þess að hafa lokið meistaraprófi frá EADA, Barcelona í alþjóðafjármálum og MBA frá HÍ.

Páll Ásgrímsson er tilnefndur af Samtökum atvinnulífsins og tók sæti í stjórn í mars 2025. Páll er aðallögfræðingur Sýnar hf. og situr í framkvæmdastjórn félagsins. Áður var Páll einn eigenda lögmannsstofunnar Juris, forstöðumaður og framkvæmdastjóri lögfræðisviðs Símans (síðar Skipta) auk þess að búa að reynslu frá EFTA og ESA í Brussel, verið yfirlögfræðingur hjá Samkeppnisstofnun og lögfræðingur viðskipta- og iðnaðarráðuneytis. Þá hefur Páll setið stjórnum ýmissa fyrirtækja, t.d. Símans hf., Mílu ehf., FARICE hf., Skjásins ehf., Já hf. og Byr hf.

Páll er lögfræðingur frá Háskóla Íslands og með meistaragráðu í Evrópurétti frá London School of Economics, ásamt því að vera með málflutningsréttindi.

Sigrún er tilnefnd af SA og tók sæti í stjórn í september 2021. Hún er framkvæmdastjóri Norðuráls á Grundartanga. Sigrún hefur víðtæka stjórnunarreynslu úr fjármálageiranum en áður en hún hóf störf hjá Norðuráli starfaði hún m.a. hjá Kaupþingi, Kauphöllinni í Osló og Verðbréfaþingi Íslands, nú Nasdaq Ísland.

Sigrún er með cand. oecon gráðu í viðskiptafræði frá Háskóla Íslands og MBA gráðu frá Norwegian School of Management (BI).