Viðbótarlán fyrir fyrstu kaupendur – 85% veðhlutfall

Lífeyrissjóður verzlunarmanna býður nú fyrstu kaupendum fasteigna að sækja um viðbótarlán og fá allt að 85% veðhlutfall. Viðbótarlán eru óverðtryggð með föstum vöxtum í þrjú ár og 0,75% vaxtaálagi. Hámarkslánstími er 25 ár.

Til að eiga rétt á þessu láni nægir að hafa greitt einu sinni til sjóðsins í séreign eða lögbundið iðgjald.

Hækkun á hámarksláni – nú 95 milljónir króna

Hámarkslán hækka í 95 milljónir króna í takt við verðhækkanir á fasteignamarkaði síðustu ár. Hámarksveðhlutfall er áfram 70%.

Til að eiga lánsrétt þarf að hafa greitt til sjóðsins í a.m.k. 6 mánuði samfellt eða samtals í 36 mánuði í lögbundið iðgjald eða séreign.

Samanburður á lánamöguleikum

Vaxtalækkun á óverðtryggðum vöxtum 

Óverðtryggir fastir vextir sjóðsins lækka úr 8,93% í 8,43% frá 16. desember. Óverðtryggðir breytilegir vextir lækka úr 9,68% í 9,15% frá 1. febrúar 2025. Viðbótarlán með óverðtryggðum föstum vöxtum í 3 ár sem bjóðast fyrstu kaupendum bera 9,18% vexti frá 16. desember.

„Lífeyrissjóður verzlunarmanna hefur frá upphafi lagt áherslu á að veita sjóðfélögum lán til húsnæðiskaupa. Það er mikill áhugi meðal sjóðfélaga að hafa aðgang að samkeppnishæfum lánum og fyrir sjóðinn hefur það verið farsæll fjárfestingarkostur,“ segir Guðmundur Þ. Þórhallsson, framkvæmdastjóri sjóðsins.  

Nánari upplýsingar eru á live.is auk þess sem hægt er að bóka tíma hjá ráðgjöfum.