Réttindadeildir fyrir séreignarsparnað eru tvær. Annars vegar B-deild fyrir almenna séreign og hins vegar C-deild fyrir tilgreinda. Eignir séreignardeilda eru ávaxtaðar í fjórum ávöxtunarleiðum: Ævileið I, Ævileið II, Ævileið III og Verðbréfaleið.

Ævileiðirnar voru stofnaðar árið 2017. Verðbréfaleið hefur verið starfsrækt frá 1999 en tekur ekki
lengur við nýjum samningum. Eignir í séreignardeildum námu 42 milljörðum króna í lok árs 2025 en voru 37 milljarðar króna í árslok 2024. Nánari upplýsingar um hverja ávöxtunarleið er að finna í fjárfestingarstefnu sjóðsins.

Verðbréfaleið

Fjárfestingarstefna Verðbréfaleiðar endurspeglar fjárfestingarstefnu sameignardeildar LV. Hrein nafnávöxtun Verðbréfaleiðar á árinu 2025 var 6,9%. Hrein meðalraunávöxtun síðustu fimm ára er 1,8%. Líkt og með sameignarleið voru litlar breytingar gerðar á samsetningu innlenda hluta eignasafns sameignardeildar.

Finna má greinargóðar upplýsingar um áherslur og markmið við stýringu eignasafna sjóðsins í fjárfestingarstefnu LV fyrir árið 2026 sem er aðgengileg á vef hans.

Ávöxtun eignasafna samanborið við viðmiðunarvísitölur

Stýring Verðbréfaleiðar skilaði einnig góðum árangri á árinu. Umframávöxtun eignasafnsins nam 1,6% samanborið við viðmiðunarvísitölu en síðustu 5 ár hefur eignasafnið skilað 0,2% betri árangri en viðmið á ársgrunni.

Allir eignaflokkar utan erlendra hlutabréfa skiluðu ávöxtun umfram viðmiði á árinu.

Innlend hlutabréf: Einna mest munaði um 15,6% umframávöxtun innlendra skráðra hlutabréfa sem stafar fyrst og fremst af lítilli eign sjóðsins í útflutningsfyrirtækjum og á móti yfirvigt í fjármálafyrirtækjum og smásölufyrirtækjum.

Innlend skuldabréf skiluðu ávöxtun á pari við eða umfram viðmiðunarvísitölu. Ávöxtunin leiðir að hluta til af uppgjöri ÍL sjóðs þar sem íbúðabréfum var skipt fyrir ríkisskuldabréf, innlend skuldabréf og reiðufé. Sala íbúðabréfanna var á lægri ávöxtunarkröfu en bókfært virði hjá LV og reiknast því gengishagnaður á árinu í kjölfar skiptanna.

Erlend hlutabréf sjóðsins er að meginstefnu ávöxtuð í skráðum hlutabréfum og að nokkru leyti í framtakssjóðum (e. private equity). Viðmið eignaflokksins tekur sem stendur einungis mið af skráðum hlutabréfum. Sé horft á eignaflokkinn í heild sinni skilaði hann 7,7% ávöxtun samanborið við 9,7% ávöxtun viðmiðs (í krónum talið) en skráði hlutinn skilaði 0,1% ávöxtun umfram viðmið.

Lakari ávöxtun erlendra framtakssjóða skýrist einkum af tveimur þáttum. Annars vegar er eignasafnið í framtakssjóðum ungt og því enn að hluta til í uppbyggingarfasa, sem leiðir til svonefndrar J-kúrfu á fyrstu árum fjárfestinga. Hins vegar er eðli framtaksfjárfestinga þannig að verðmat þeirra breytist hægar og fylgir því síður sveiflum á skráðum hlutabréfamörkuðum. Samhliða nýrri fjárfestingarstefnu á vormánuðum er stefnt að því að endurspegla aukið vægi framtakssjóða í eignasafninu með sérstakri vísitölu því tengdu.

Erlend skuldabréf lækkuðu um 1,1% á árinu 2025 samanborið við lækkun viðmiðs um 2,0%. Viðmiðið tekur einkum mið af skuldabréfum í fjárfestingarflokki (e. investment grade) en við stýringu eignaflokksins er lögð áhersla fjárfestingar í bréfum sem bera hærri vexti, svo sem hávaxtabréf (e. high-yield). 

Ævileið I

Fjárfestingarstefna Ævileiðar I heimilar fjárfestingu m.a. í hlutabréfum og skuldabréfum, skráðum og óskráðum, hlutdeildarskírteinum sjóða, innlánum og öðrum fjármálagerningum.

Stefnt er að því að vægi erlendra eigna sé um 35% af heildareignum Ævileiðar I. Þessi leið hentar þeim sem ávaxta séreignarsparnað til lengri tíma en markmiðið er að skila góðri langtímaávöxtun að teknu tillit til áhættu með skilvirkri eignadreifingu. Hrein nafnávöxtun Ævileiðar I var jákvæð um 8,2% í árslok 2025. 

Síðustu ár hefur ávöxtun leiðarinnar að öllu jöfnu verið jákvæð að undanskildu árinu 2022 þegar ávöxtun hennar var neikvæð. Það er að mestu rakið til neikvæðrar afkomu hlutabréfamarkaða. Samkvæmt fjárfestingarstefnu 2026 er stefnt að því að safnið skiptist í 50% hlutabréf og 50% skuldabréf.

Ávöxtun í samanburði við viðmiðunarvísitölu Ævileiðar I

Góður árangur náðist í stýringu Ævileiðar I á árinu 2025. Umframávöxtun eignasafnsins nam 3,3% samanborið við viðmiðunarvísitölu og undanfarin 5 ár hefur stýring eigna skilað 1,0% ávöxtun umfram viðmið á ársgrunni. 

Innlend hlutabréf skiluðu 14,4% ávöxtun umfram viðmiðunarvísitölu. Þessi árangur skýrist fyrst og fremst af undirvigt sjóðsins í útflutningsfyrirtækjum og á móti yfirvigt í fjármála- og smásölufyrirtækjum.

Innlend skuldabréf skiluðu ávöxtun umfram viðmiðunarvísitölur í öllum skuldabréfaflokkum,
en umframávöxtunin nam á bilinu 1,2% til 2,0%.

Erlend hlutabréf skiluðu 0,3% umframávöxtun samanborið við viðmiðunarvísitölu flokksins. Öll hlutabréfaeign ævileiðarinnar samanstendur af skráðum hlutabréfum.

Erlend skuldabréf lækkuðu um 3,9% á árinu 2025 samanborið við lækkun viðmiðs um 2,0%.

Ævileið II

Ævileið II horfir einkum til meðallangs tíma við ávöxtun fjármuna að teknu tilliti til áhættu. Hún hefur heimild til að fjárfesta m.a. í hlutabréfum og skuldabréfum, skráðum og óskráðum, hlutdeildarskírteinum sjóða, innlánum og öðrum fjármálagerningum. Nafnávöxtun Ævileiðar II var jákvæð um 8,1% árið 2025.

Markmið leiðarinnar er að um 18,7% heildareigna hennar fari í fjárfestingar erlendis.

Ávöxtun í samanburði við viðmiðunarvísitölu Ævileiðar II

Stýring Ævileiðar II skilaði einnig góðum árangri á árinu. Umframávöxtun eignasafnsins nam 2,5% samanborið við viðmiðunarvísitölu undanfarin 5 ár hefur stýring eigna skilað 1,0% ávöxtun umfram viðmið á ársgrunni.

Innlend hlutabréf skiluðu 14,4% ávöxtun umfram viðmiðunarvísitölu. Þessi árangur skýrist fyrst og fremst af undirvigt sjóðsins í útflutningsfyrirtækjum og á móti yfirvigt í fjármála- og smásölufyrirtækjum.

Innlend skuldabréf skiluðu ávöxtun umfram viðmiðunarvísitölur í öllum skuldabréfaflokkum, en umframávöxtunin nam á bilinu 0,8% til 2,0%.

Erlend hlutabréf skiluðu 0,7% umframávöxtun samanborið við viðmiðunarvísitölu flokksins. Öll hlutabréfaeign ævileiðarinnar samanstendur af skráðum hlutabréfum.

Erlend skuldabréf lækkuðu um 4,1% á árinu 2025 samanborið við lækkun viðmiðs
um 2,0%.

Ævileið III

Áhætta Ævileiðar III er takmörkuð við samsetningu skuldabréfa og innlána. Markmið safnsins er að varðveita áunna eign en skila um leið jákvæðri raunávöxtun. Ævileið III horfir til meðallangs eða skemmri tíma við ávöxtun að teknu tilliti til áhættu. Hrein nafnávöxtun Ævileiðar III var jákvæð um 8,6% á árinu 2025.

Samkvæmt fjárfestingarstefnu fjárfestir Ævileið III í skuldabréfum, hlutdeildarskírteinum og innlánum. Stefnt er að því að 80% safnsins séu í skuldabréfum og 20% í innlánum eða lausafjársjóðum. Hlutabréf eru ekki hluti af fjárfestingarmengi Ævileiðar III.

Ávöxtun í samanburði við viðmiðunarvísitölu Ævileiðar III

Góður árangur náðist í stýringu Ævileiðar III sem skilaði umframávöxtun samanborið við viðmiðunarvísitölu upp á 0,8%. Undanfarin 5 ár hefur stýring eigna skilað 1,0% ávöxtun umfram viðmið á ársgrunni.

Eignir Ævileiðar III samanstanda eingöngu af skuldabréfum, peningamarkaðssjóðum og innlánum. Allir skuldabréfaflokkar skiluðu umframávöxtun á bilinu 1,0% til 1,6% miðað við viðmiðunarvísitölur.

Ávöxtun innlána og peningamarkaðssjóða voru 0,5% undir viðmiði og skýrist einkum af innlánsvöxtum sem voru undir 8,5% ávöxtun viðmiðunarvísitölunnar.